Es ke Sefaradim pueden tornar a Espanya?

me llego este articulo interesante de "LadinoKomunita y deseo compartirlo :

Oy salio un artikolo muy largo i muy enteresante artikolo en el Jewish
Daily Forward, diario djudio-norteamerikano, tratando del estado de la
ley espanyola (i de la portugeza tambien) ke promete dar la
nasionalidad espanyola a los sefaradim.  El autor, desendiente de los
primeros sefaradim ke yegaron a Norte Amerika en 1654, i teniendo en
su mano el papel mostrando la arvole de su desendensia desde los
1600s, viaja a Espanya en bushkeda de obtener nasionalita espanyola, i
va a varias sivdades por konoser sus raises en eyas, i abolta mas
desatado de akeyas raises, i mas desenteresado en "retornar" a ser
espanyol.  En esto todo, mos eksplika el krisis ekonomiko i sosietal
de Espanya, la politika detras de las leyes i los pasos de atirar
sefaradim i judios, el estado de las komunidades djudias, de los
konversos ke se estan konvertiendo al judaismo, i mas i mas.   Konklye
kon una vijita al viejo semeterio de Shearith Israel en Chatham Square
de New York, el mas viejo semeterio djudio en la Amerika.  (Shearith
Israel, la kehila espanyol-portugeza, fue fondada de los primeros 23
djudios ke yegaron de Recife, Brazil, a New Amsterdam, agora New York
City, en 1654. ) Es un chiko semeterio, serrado desde los 1820s.

El artikolo, eskrito por Josh Nathan-Kazis,  es entitulado "Can
Sephardic Jews Go Home Again — 500 Years After the Inquisition?" (Es
ke los Sefaradim pueden retornar a kaza - despues de 500 anyos desde
la Inkizision?) i se topa en:
http://m.forward.com/articles/191376/can-sephardic-jews-go-home-aga...

Del artilolo, aki vos vo dezir solo ke ni en Espanya ni en Portugal no ay dainda un
proseso para desidar komo  se puede dar la nasionalidad del pais, o
ken es el ke se konsidera sefaradi, i komo se puede desidar ken es i
ken no.  I  la kestion es tan komplikada ke no ay dinguna manera ke
este proseso se puede spesifikar i aktualizar.  Ni un pais ni otro dainda no dieron un pasaporto de nasionalidad a algun sefaradi ke izo la aplikasion!

I una nota mia:  el titolo aze un yerro ke vemos muncho en eskritos
populares - el mesklar la Ekspulsion i la Inkizision.  El dekreto de
ekspulsion de los judios es de 1492.  La Inkizision se establesio en
Espanya en 1478, i se anulo solo en 1834.   Ma es posible ke es el
editor del jurnal i no el eskritor ke metio esta fraza en el titulo.
El artikolo  me plazio muncho i lo meldi kon grande entereso.  Se ve
muy klaramente  ke el mansevo eskritor konose muy bien la estoria
sefaradi.  (A el lo vesh en el video ke se topa en el sitio.  A los ke saven ingles, rekomendo ke lo sientan avlar de su vijita a Lucena.)

Rachel Amado Bortnick
Dallas, Texas

http://www.larepublica.pe/22-03-2014/usted-podria-recibir-la-nacion...

kiero augurar Fiesta de Pesah alegre , salud buena i sin mankura de ningunos

Tengash todos i en famiya  Semanada buena !

Chag Pessach Sameach!